鍾舒漫當年爆紅的歌叫《給自己的信》，如今離開了入行至今15年的英皇，她說是時候給自己一個交代。
對於舊公司，還是心存感激。「起碼，畀咗個名字我呀，啲人聽到鍾舒漫個名，你唔識佢啲歌，好熟口面你個人！」
對於最近與那位前港姐陳潔玲，合作不成反變追數的糾紛，鍾舒漫說以往的自己，可能選擇「算數」，現在懂得要爭取屬於自己的。于文鳳追7,000萬是錢，鍾舒漫追40,000都是錢！公開事件變成話題焦點，鍾舒漫說不介意，「到最後我都覺得係花生一則，其實好快就過。」
沒有大公司庇蔭，更加大無畏，「𠵱家我同自己交代，後果自己take反而仲爽，𠵱家我係兩袖清風，有乜我自己食，我抵嘅！」
這次決意上庭追數的鍾舒漫，也是給自己一個交代。
撰文：文嘉龍
本來以為可以好好合作賣抗疫產品，卻演變成錢債糾紛，鍾舒漫追不回那40,000蚊的退股款項，入稟小額錢債審裁處，向陳潔玲追討。這單新聞最近鬧哄哄，牽連埋胞妹鍾舒祺、曝光埋MV導演男友……鍾舒漫在上庭前的小小總結是，「我覺得人生總會經歷一啲人同人之間誤會又好、不信任又好，我當人生一個經歷，自己上咗一堂。」
鍾舒漫入行15年，她坦言以往睇電視電影，或者聽人講就多，估不到自己親身遇到。她說，以往的自己，可能會「算數」，現在的她，要做應該做的事，「我以前好多時都『算啦』唔好搞啦，『由佢』唔緊要啦！我唔係好鍾意自己以前呢種性格，以前嘅自己係逃避紛爭，我唔想同任何人關係破裂，就算可能自己受咗傷害都忍咗去算，不過今次個人大咗，唔係話挑唔挑起紛爭，係應該要做返應該嘅嘢，對自己都係一個尊重囉！」
陳潔玲早前話，一個做咗十幾年嘅藝人，區區為咗幾萬蚊，好肉酸囉！鍾舒漫今天說：「錢，我第一日已經放棄咗，我同我個妹都放棄咗！你可能會話，放棄咗又去入稟？入稟梗係關於錢嘅問題啦，我唔係入稟去同你傾吓偈，主要係件事嘅問題。」
不介意成為網民討論話題，「你話對方講咗啲乜嘢說話，可能想有少少貶低或者詆毀，呢啲我又OK，我明白對方都會有佢情緒，不過係處理手法問題！既然搬咗上枱，我都唔覺得自己好叻去面對呢一類型新聞！Anyway，到最後我都覺得係花生一則，其實好快就過，當俾人茶餘飯後有嘢講吓！」
鍾舒漫說：「其實所謂要交代真相，真係好long story，我都係留待我上庭時候同佢哋去傾囉！」說到妹妹鍾舒祺的錄音聲帶流出，「始終嗰個係我個妹，流咗（錄音）出嚟，我覺得好唔舒服。我個妹其實又唔係好care，佢純粹係嬲，好肉酸呀，點解一定要用呢個方法呢？無端端搞到我哋好似好是非，有少少被動，但係都唔緊要啦，最緊要係Sukie（鍾舒祺）唔怕有乜嘢畀大家知道，唔介意人哋點講，總之我係緊張我家姐！」
不只妹妹的電話對話被流出，連鍾舒漫的MV導演男友Steve也連帶出場。不過關於和男友的關係，鍾舒漫說：「我諗呢一刻留返畀我自己私人世界，我選擇今次唔講自己嘅愛情，𠵱家係乜嘢狀況都唔會解釋。講完呢次都可以close file，好老實講，雖然做咗呢行咁多年，但都唔想有呢啲嘢浮面，的而且確發生咗喺我身上，我要處理都盡量想低調啦！」
的確如今萬事得靠自己處理，鍾舒漫今年9月約滿離開了工作15年的英皇，現在真的要靠自己，「之前有公司有多啲人去back up，𠵱家好多嘢要自己嚟，我可能要再搵人去幫我安排一啲嘢。以前就算我仲喺公司，我都會繼續拍YouTube片，不過我要畀公司睇，嗱，我要post呢條片，你哋望一望啦，𠵱家就冇咗呢個步驟。」
離開一個15年熟悉的地方，當然不容易，但難嗎？也不算。鍾舒漫是很堅決離開的，「自己想試多啲自己嘢，唔係話以前公司試唔到，始終公司真係人多，有時我想做嘅嘢，如果時間未match到，可能我又要停一停、等一等！我記得臨走，我同老闆（楊受成）講拜拜，老闆同我講，『OK呀，自己闖一闖囉！公司多人，未必真係take care得好好』，對我嚟講，呢個係佢嘅一個了解、佢嘅安慰！我覺得好窩心！」
曾經覺得被忽略？「外人睇咪可能覺得被忽略囉，係咪唔捧你呀？好多呢啲好表面嘅說話，但係我喺裏面15年，自己知得最清楚。你話係咪可以完美地供給到你想要嘅嘢呢，冇一個地方係完美、冇一個人係完美，可能佢哋ready晒啲嘢畀你，我有我自己嘅問題，我失場嘅時候點呢？人會錯，我會瀨嘢，我會撻Q，反而我諗返，佢哋點樣同我一齊拆係好深刻！我今日有時間同能力幫你做呢件事，但未必得到大家心目中想要嘅結果，係咪代表緊佢哋唔幫我唔捧我被忽略呢？唔係囉！」
星途高低上落，大公司總是人來人往，開心的一起作戰，挫敗的也試過幾個月零收入的滋味，「總之兩三個月之後就一定會有返收入，呢個狀態on and off每年都會有一個月係咁，下個月又會幫我頂返晒，做人就係咁，好上落。我覺得開心嘅係去到今時今日，我同我個妹依然負擔到，負擔到我屋企人，我哋都仲未死，仲供到樓，拎住好多嘢嘅時候都仲可以搭的士，我覺得已經好感恩。曾經有段期間，我同我阿妹壓力幾大，樓換樓期間我哋資金計算有少少錯誤，變咗每個月唔知要點樣跑啲數返嚟，好辛苦但係永遠唔知點解又過到喎，我同我個妹好相信，無論我哋乜嘢環境都好，我哋都會有出路。」
當年鍾舒漫參加英皇新秀入行，因為一顆智慧齒。「我喺美國做緊暑期工，跟住生智慧齒，痛到不得了，但係我唔係當地居民，變咗我要畀嘅牙醫費，直情可以cover來回香港機票之餘，仲可以喺香港玩一陣，我覺得不如返香港。我返香港純粹為剝牙，機緣巧合畀我打開本雜誌，嗰時好興有一版係連載住乜乜乜歌唱比賽嘅參賽表格，最搞笑望完嗰下，閂埋本書都係冇感覺，跟住我朋友打嚟，喂，𠵱家有新秀歌唱大賽喎，你不如試吓去參加啦！好似喺生命當中，有啲嘢係想推你去！以前嘅我，唔想喺人哋面前話畀人聽，我係鍾意唱歌，好驚，但其實我又好想上台表演！」
入行初期賣跳唱「黑妹」形象，鍾舒漫的爸爸是印尼華僑，這個皮膚色絕對純天然。鍾舒漫在美國主修音樂，一直鍾情美式音樂，「有時我攞啲demo出嚟，公司會話鬼妹唱就make sense，但係廣東話唱就說服唔到，我理解嘅！」
15歲已經學跳舞的鍾舒漫，要唱歌跳舞反而令她倍感壓力，「第一首歌叫《高手過招》，係咪我最想要嘅嘢呢？唔係，但唔代表隻歌同隻舞唔好！我想唱Christina Aguilera、Britney Spears嗰啲呀，我想跳Beyonce嗰啲，但係你要想像下如果變咗廣東話會點，再加上我當時跳舞唔係跳得咁好，我雖然成日上堂，15歲已經開始學跳舞，但我發現on stage我要跳舞，我好似隔咗層嘢，感覺變咗好冇自信，你知做跳唱，出嚟個勢就係要自信，好老實，跳唱未必要唱得好好，但係你嘅台風魅力，一定要炸，當時剛出道嘅我完全凌駕唔到。」
到了《好好擁抱》這類K歌才令歌迷真正認識鍾舒漫，之後爆紅的《給自己的信》更加大受歡迎。鍾舒漫說，每首歌都有自己際遇，可遇不可求，「好老實啲人嗰時都唔係話好認識Sherman，認識隻歌咋嘛，𠵱家年代唔同，網絡世界，你只要願意，好多人都會有機會認識你。我哋睇《全民造星》，好多人最初都係好生面口，但係經過一連串比賽過程，你日日追，好似同裏面主角們產生咗感情，開頭你可能唔鍾意，去到最後越嚟越鍾意。我嗰個年代，呢一隻歌都冇呢一個配套。」
未來的路自己行，繼續拍YouTube片之餘，亦為一個新網台拍攝短片，而之前受困擾的聲帶問題也康復了，將以最佳狀態為自己的新歌埋班。自己向外闖，沒有大公司管束，多了一分自由？「可以咁講，但我唔想人哋誤會我以前喺公司唔自由囉，因為自由對我嚟講，係睇你個心㗎，你可以喺一個好多規限嘅地方，但係你裏面係唔會俾佢綁住，呢個都係自由！所以𠵱家我喺表面上嘅自由，好似方便咗，想做啲咩、條路點行方便咗，多空間咗！」鍾舒漫說。
鍾舒漫帶住大支裝兩公升的飲品到場，做完訪問後狂灌幾口，36歲的她說：「啲美肌嘢，抗氧化！」說起當年《給自己的信》之後無以為繼，「我無悔，不過我當時亦都唔係好識得同自己爭取嘅人，《給自己的信》嗰段時間，我真係坐喺度等，飯來張口畀心機做，甚至乎有公司同事都會覺得，點解嗰時冇再去push吓，又唔係喎，但係大家會你眼望我眼，大家有好多問號！」
歌有歌命，人有人運。關於《給自己的信》都有不少錯摸，「好多人講咗《給自己的情書》或者你嗰首《給自己的一封信》……有時我都唔想同人解釋咁多，因為你解釋咁多，又好似多咗層嘢！我其實好鍾意你嗰首《給自己的一封信》呀，係呀，多謝呀，多謝咗先啦，你知邊首咪得囉！」
歌名錯了就要認，現在的鍾舒漫，應該會立即糾正。
場地提供：One Step Studio