上星期三，高明同利世民喺Webinar入面講樓市未來十年，高明講到唔好幻想一國一制之後，香港嘅樓價會即刻下跌，理據係鄰近嘅中國深圳一直行一國嘅制度，樓價不斷上升。不過，一國兩制即將成為歷史文件，當日嘅講法已經會有偏差，有必要補充。
QE再加上辣招，令過去失業率、薪金、經濟增長等因素，變得同樓市無關，亦令好多人問點解武肺再加政治環境咁差，樓價都仲可以上升。
樓價又升啲乜？差餉物業估價署數字顯示，QE後越細升得越勁，400呎樓下升3倍，千六呎以上就只升接近一倍。出現呢個差異，主要因為越有錢嘅人，可以接觸嘅資產類別越廣闊，香港豪宅升得太貴，轉買其他資產。
推論未來十年，已經有趨勢顯示派息、收租嘅回報越嚟越少，意即資產階級都會搵食艱難。豪宅過去十年已經跑輸，如果實施一國一制，為來港走資嘅富豪，都唔會選擇香港做落腳地，未來十年托住香港樓價嘅因素，一定唔係豪宅。相反，每日要打卡返放工嘅勞苦大眾，住處受工作地點綑綁，而且資金有限，可以選擇嘅資產唔多。但就係因為呢個局限，令樓價越細越貴，樓價長升長有嘅神話，主要都係升大眾買到嘅樓。
深圳點解喺一制嘅框架之下越升越有？因為絕大部份嘅人冇離開嘅選擇權，為咗維生只有喺附近工作投資置業。香港情況都一樣，呢一班勞苦大眾買嘅中小型單位，將會主導未來十年樓價走勢。
不過，幾日之間香港就取消兩制，加速咗本來想走嘅人，亦影響咗國際形勢。香港求其擁有一個物業，去到全世界大部份地區，已經相當寬裕。如果香港突然間有270萬人擁有免費嘅外國居留權，勞苦階層忽然擁有資產階級嘅選擇權，大家一齊走資，將成未來十年嘅投資主題。
高明
http://fb.com/bigricetea
本欄逢周一刊出