周秀娜日前現身活動時強調仍然單身，希望努力覓得真命天子，但佢嘅髮型師舊愛陳偉成（Avis）就宣佈封盤，今年6月底時成功向拍拖半年嘅model女友黃樂樂求婚，當時Avis仲話好想組織家庭。一對準新人早前已影咗一輯結婚相，計劃明年搞童話式婚禮。《蘋果》噚日發現佢哋已入紙申請註冊結婚，38歲準新郎Avis報稱做髮型師，而24歲準新娘原來真名叫黃藹樂，職業報稱係牙醫護士。
明年先擺酒
《蘋果》噚日致電Avis了解呢件事，佢喺電話中開心回應：「係呀，我哋想註咗冊先，會同兩家屋企人食飯，下年先擺酒，要等楊天命擇日子。」
Avis早前同黃樂樂影婚紗相時，準新娘喺影樓嘔吐，即被懷疑係奉子成婚？Avis解釋：「應該唔係，佢腸胃炎箒。」講到造人計劃？Avis話：「我同老婆都鍾意小朋友，要嚟就隨時歡迎，我哋都計劃緊，都想生一男一女，湊成一個『好』字。」近年Avis喺事業上拼搏，先後經營髮型屋、美容同健身院生意，早有準備儲蓄老婆本，如今事業愛情兩得意。
撰文：馮仁昭