林夏薇早前駕駛保時捷跑車上山頂回家途中，被小路出大路嘅保時捷四驅車攔腰直撞。四驅車女司機被控不小心駕駛罪，林夏薇上周三出庭作供時稱當時以正常車速開車：「當時隱約feel到、睄到嗰度有車，冇睇到係一個實體，有燈，但車未到。」
供詞被指自相矛盾
林夏薇指意外令佢頸椎受傷，案件前日裁決，裁判官指林夏薇供詞自相矛盾，但又不能排除被告指林夏薇當時車速太快，喺疑點利益歸於被告下判罪名不成立。
林夏薇對判決失望，噚日喺Ig撰文表達不滿：「我車被撞的位置是副駕駛座至後沙板，對方是右前輪同前泵把花咗。對方為自己辯護話佢在讓路停咗2、3秒先駛出，然後佢架車出咗7、8成，我架車先在後飛速平行撞上。以物理學角度睇根本冇可能發生！我點樣可以用我的左車身撞她的車頭！明明車的撞擊傷痕是我被撞，對方竟然惡人先告狀，反過來話我從後衝上嚟！而事實上嗰個路段已安裝安全島去限制路面闊度，所以條路的闊度根本不可能容得下兩架車平行行駛！但仲失望的是法官竟然考慮對方的車身高過我的車身，同埋考慮我是公眾人物，我唔明以上兩點同佢小路出大路撞人，不小心駕駛有乜關係？」林夏薇大呻身為證人喺庭上唔可以反駁，佢揶揄：「公平公正在哪裏？人在做天在看，馬路殺手太多了，大家真的真的要小心！」
撰文：陳杰