自古英雄難過美人關，友邦MPF調查發現，有三成半人曾因為氹伴侶開心而搞到欠債，係港人主要墮入嘅理財陷阱之一，當中有六成人係男士，真係要唱一句「這陷阱這陷阱偏我遇上」。
「愛妻號」森美都大嘆，男人要錫老婆，好多時都冇辦法。原來森美老婆最鍾意買袋，次次都同佢講，用完可以賣番出去，森美唯有乖乖畀錢，但佢從來未見老婆賣過袋出去囉。
唔好以為理財專家就有辦法，好似港大社會政策講座教授周基利教授，佢都話敵不過老婆嗰關，所以奉勸港男sell物輕情義重，「有啲手工係要做吓」，睇唔出教授都有小浪漫嘅一面。
如果手工唔得，教授就建議港男將「消費」同「儲蓄」賬戶分開，規定「儲蓄」賬戶一定唔可以用，避免自己過度消費。講到呢度，森美就好清醒，指「消費」賬戶最後都係自己戶口，而「儲蓄」賬戶就一定係老婆私己錢喇。