自演唱會之後，Kay休息咗差唔多大半年，個月肚一日大過一日，《蘋果》日前見到佢，個肚仲大到成座山咁，好彩身邊有老公張繼聰照顧咋。
陀B係辛苦嘅，尤其係巨肚，好似黎姿咁，10年有喜時就要5個人喺身邊侍候，無耐就生咗一對孖女，大女重約6磅，細女都有3磅幾。
10月懷胎呢個過程係辛苦嘅，但都好值得紀念，好似安排太太喺香港生仔嘅趙文卓，今年8月就同太太影咗全裸寫真，個焦點梗係影個巨肚啦。
另外，黃伊汶（Emme）今年初都有約埋老公陳國坤影巨肚寫真，Emme除咗用巨肚頂老公，仲有一張係「低炒」，顯得個肚特別勁。
除咗影相，巨肚都仲可以用嚟畫畫，鄭希怡（Yumiko）上年陀B嘅時候，就試過喺肚皮上畫咗個小女孩嘅樣，結果佢嘅B女梁浸浸出世，真係同幅畫一樣，精靈可愛。