法律界今次嘅選委戰，精采咯，除咗泛民陣營以兩張名單冀全取30席，仲有民主思路湯家驊單拖上陣，原來翁靜晶（圖）都報咗名，但就有少少甩轆，皆因有三個提名佢嘅法律界，冇登記做選民，不符提名資格，所以翁靜晶噚日接獲通知後四出再搵人提名，但佢話事件都可以反映到，好多沉默嘅一群，向來冇乜理政治，呢個正係佢出選嘅原因！
點解獻出參選第一次？佢話近一年發生嘅事，令佢想代表沉默嘅一群發聲，「有啲人心裏有諗法，都唔會講出嚟」，所以特別代表呢班人表態，「睇佢哋連選民都冇登記，就知佢哋過去好少理（政治）」。
要胡官 拒689
佢特別強調特首要有孫中山嘅博愛精神，無私大愛，和諧兼願溝通，「最重要，係誠實」。咁，梁振英符唔符合呢個誠實條件？翁靜晶冇直接回應，只稱一旦當選，係代表法律界投票，所以會收集界內意見，但若只得CY鬥胡國興，梗係會支持胡官啦，但佢話最終都係要睇有咩人出選。雖然有熱誠參選，但佢預計出線機會好低，因為其他參選人粒粒皆星，只希望事件可鼓勵業界關心身邊嘅事。