先有紅眼殭屍門將，再有失憶重拳，最後仲有令人O晒嘴嘅飛機王！喺周三比利時作客逼和荷蘭1:1嘅友賽中，呢支歐洲紅魔全方位咁嚇親球迷。
盧卡古四碼失機照和荷蘭
比利時門將泰拔高圖爾斯未開波已經嚇親街坊，佢今場坐後備，但鏡頭一影埋去，見到佢成隻左眼都紅晒，好似睇緊大台之前套殭屍片咁樣。可能高圖爾斯都驚大家當佢係殭屍，賽後解釋話佢隻眼冇事，唔會影響守龍喎。後備席有殭屍，場上就有拳王，打正選嘅米洛列特喺上半場打手槌，唔好彩手踭打中咗荷蘭前鋒雲遜贊臣；雲遜贊臣倒地兼要退下火線，失憶咗20分鐘先醒番，真係嚇親啲荷蘭球迷。
荷蘭38分鐘由卡拉臣12碼開紀錄，比利時其後派盧卡古入替強攻，點知呢位愛華頓鋒將接應夏薩特傳中，離門四碼炒咗上看台！但佢哋最後都靠恩歷克卡拉斯高扳平1:1完場。另外，比利時「玻璃人」高柏尼本來踢正選，但賽前半個鐘突然冇份踢，教練馬天尼斯話佢熱身嗰陣有啲唔舒服，所以就費事博，驚佢又傷過。