美國總統大選結果出乎好多人嘅意料。講真，呢啲先叫做選舉嘛，一早知結果嘅仲點算係選舉呢？你估好似香港咁，1,200人選特首要問過阿爺先？
5年前今日，前港區人大代表吳康民話，港澳辦主任王光亞暗示，北京畀香港特首選舉出現兩個人角逐，意味唐唐同梁振英可以一齊落場，原因係可以睇到佢哋嘅治港理念同政綱。吳康民仲話中央唔需要勸退任何人，事關喺選委會施加壓力，令到其中一個人攞唔到150個提名就得。嘩，干預香港內部事務，畫公仔真係要畫到咁出腸？
咁啱梁振英亦喺5年前今日話，無被中央勸退，備選工作好順利，了解緊選特首嘅指引同相關法律，會盡快公佈參選日期同班底。
如此說來，有冇得選特首，似乎唔係小圈子選委決定，而係北京話事；唔使勸退人，喺選委會做手腳咪得囉？呢個推演，選委唔知點睇？