立法會復會後，口水戰接連而至，噚日最新上演嘅，係長毛梁國雄大戰何君堯，兩人因為宣誓風波，喺傳媒咪兜前擦出火花，互相以金句寸爆，相信呢啲火花，未來四年陸續有來。
「用刀叉食人肉」
話說噚日有反佔中市民入稟高等法院，要求取消包括長毛在內嘅8名非建制議員資格，長毛朝早喺立法會見傳媒，批評何君堯「恐嚇」政務司司長林鄭月娥係「下三流」行為，「教司長做嘢，係非常之僭越」。
有時真係日頭唔好講人，皆因此時何君堯咁啱就路過，即刻上前企喺長毛側邊問：「點樣恐嚇？」此後仲一直企喺長毛隔籬，寸步不離。聽長毛批評人大釋法嘅要求，都係強加喺法例上，強調議員係咪符合法例要求，應留畀法院裁決，又以啱啱當選美國總統嘅特朗普為例，指對方「十誡犯十一誡」，但佢嘅政敵都唔會因此質疑特朗普發假誓。
何君堯就搶住回應話自己喺內委會要求官員「處理」長毛以及羅冠聰，係符合議會章程，屬自由表達，不帶恐嚇性，只係要求處理議會內不正常行為喎，仲揶揄長毛，「我唔會好似梁議員咁用午餐肉掟人」，繼而又多謝長毛畀個機會同佢交流。
呢吓輪到長毛反擊嘞：「用刀叉食人肉，都唔係文明；着西裝唔代表唔係衣冠禽獸嘅！」
李八方
mailto:[email protected]