唔想見到嘅事情真係發生了，色狼特朗普選贏希拉莉，成為美國總統，於是事先以為希拉莉贏面高嘅亞洲股市在星期三一齊跌到四腳朝天，左丁山係屬於「謹慎看好希拉莉」一派，在本欄講過。自己睇差一皮但好彩冇輸錢，因為早在9月27日本欄寫「特朗普有機股市有難」，引述基金P之言，特朗普有一半機會當選總統，叫客戶開始止賺，逐漸沽貨；之後，左丁山亦將自己嘅部份股票賣掉，增持現金。
特朗普當選，有人罵民調誤導，全不可信。其實唔關民調事，今次競選高潮迭起，民調早有反映，希拉莉領先程度，由雙位數逐漸下降至單位數，至投票前一兩日，更只係領先三個百分點左右，屬統計誤差範圍內，根據上次英國脫歐民調調查嘅教訓，一旦加入啲「游離民意，未確定民意」，希拉莉就沒有必勝把握，一間Big Data公司代表更曾在十一月八日（香港時間早上五時）在CNBC指出特朗普可勝。弊在股票市場普遍憎厭不穩定性，心理上唔喜歡特朗普，故此過份相信希拉莉民意領先等於必勝，因而過份勇猛入市，到特朗普真的贏了，不少機構投資者真的暈了。
從世界大勢講，特朗普入主白宮，係基層普羅大眾選民壓倒知識精英、商界文化界精英；特朗普嘅民粹宣言、保護主義、本土第一主義壓到自由貿易、全球化、與理性探討，情況與泰國前總理他信憑優惠農民政策，抬高白米價以取悅佔人口多數嘅泰國農村選民，並無不同。只不過泰國精英集中於曼谷，保皇派及軍隊於是群起反對他信，卒導致軍人政變，趕走他信而已。美國當然唔會有軍事政變，東西兩岸之「鹹水派」知識精英除非找到法律漏洞，挑戰特朗普當選之合理合法性，否則以後四年不得不忍受一個野蠻人在白宮發施號令。共和黨明年完全控制白宮、參眾兩院，勢必推翻不少奧巴馬8年來的心愛政策，如醫保法案（Obamacare），民主黨也誓死抵抗，美國政爭不絕，刺激經濟的責任落在聯儲局身上，而「特朗普總統」早已表明不喜歡2018年任滿的耶倫，要另選新人。總之，2017年美國感冒，全世界受感染大傷風，股市行將忽上忽落，散戶投資者無所適從，小心為上。