早前有傳一班新聞界地位十足嘅傳媒老鬼打算成立一個網媒，立場、資金同編採都強調獨立，近月開始有眉目。呢個網媒已經命名，叫《眾傳媒》，英文名叫做Citizen News，已喺荔枝角環薈大廈租咗辦公室，近月開始派記者採訪。
盼眾籌支持營運
搞《眾傳媒》嘅新界聞殿堂級老鬼包括記協前主席兼香港電台前採訪主任麥燕庭、明報前總編輯劉進圖、明報前執行總編輯姜國元（安裕）、《南華早報》前資深政治編輯兼《信報》前副總編輯楊健興（Chris Yeung）等，總編輯一職就由台灣《蘋果日報》前網路中心總監李月華執掌。搞手們都希望重拾傳媒昔日光輝，以獨立嘅身份報道新聞。
李月華同傳媒講，《眾傳媒》有手機版同埋桌面版，𠵱家忙於搞網站設計同埋供稿系統，希望下月推出，現時受薪同事約有10個。李月華話，之所以搞《眾傳媒》，係希望喺即時新聞鋪天蓋地嘅社會提供深入、容納不同意見、分析文章嘅平台畀讀者：「我哋唔會有好多即時新聞，但希望新聞能夠做得深入啲，提供唔同嘅見解畀讀者。」
傳媒嘅資金向來惹人注目，李月華話，有幾位捐款者因為支持佢哋嘅理念，所以捐錢成立《眾傳媒》，但唔能夠透露對方身份。至於日後嘅資金，佢哋希望透過眾籌方式支持營運。佢又話《眾傳媒》係咪能夠長遠營運下去，最少都要睇3年時間。
李八方
mailto:[email protected]