港九區學界D1泳賽一向係男、女拔天下，舊年分別造出23同28連霸，今晨喺九龍公園游泳池舉行嘅決賽力爭再度衞冕。不過，一眾傳統強校都拒絕認命，實行抵抗男、女拔壟斷！上年總亞軍聖若瑟喺首日初賽由中六隊長馮子政帶領下，喺A Grade以兩分之微壓住男拔排第一，佢話泳隊特登將B Grade隊長陳柏軒升上A Grade幫手搶分，目標力阻男拔取得「大滿貫」。喇沙隊長程郁浚就話雖然未被外界睇好，但希望隊員出盡全力，揚言要贏冠軍。
至於多年嚟都屈居女拔之後嘅協恩，前隊長史卓妍認為壓力喺對手度，希望所有隊員造出最佳成績；中五隊長謝瀞霆就話今年實施咗人流管制，令好多同學嚟唔到現場打氣，反而令泳隊鬥心更強！（樂視今日8:25am直播）