何超儀昨日在沙田出席「蘋果日報慈善基金慈善行2016」擔任慈善行大使，其間超儀與一個基金受惠家庭洪先生及其一對年幼子女樂樂、欣欣見面，得悉洪妻早前因急性淋巴性白血病離世，超儀亦感動得眼濕濕。她說：「自己今年亦經歷咗一啲大嘅事件，好彩有身邊朋友同屋企人嘅幫助。年輕人可能冇經歷過呢啲病痛，係真係好需要其他人即時畀到意見，因為當時個人一定會好亂。」
早起做運動
問超儀當日知道老公陳子聰身體出毛病，是否都一樣覺得好亂？她坦言：「係呀，好多謝身邊朋友同屋企人救咗我，我都四周圍打電話向朋友求救，自己好多嘢唔識，有乜嘢解救方法都唔知，希望《蘋果》呢個基金，可以提供埋多啲方法畀大家參考，例如直腸病點醫、嚴重嘅有乜嘢後果？」
提到子聰的康復進度，超儀大讚老公：「佢出院後keep住做運動，我𠵱家追唔到佢，佢好乖，好有決心，仲弗過我，成日早起身過我做運動。」可會叫老公和爸爸賭王何鴻燊一齊做運動？超儀笑言：「有時我都返去同佢做吓，老人家有時唔願郁，我都要諗辦法𠱁佢，等佢郁吓。」
另外，超儀昨日極受樂樂、欣欣歡迎，尤其只有5歲的欣欣，全程拖實超儀，又跟她合唱媽媽生前最喜歡聽的《一生何求》。
大讚小朋友
超儀謂：「妹妹個媽咪過咗身，不過佢哋好勁、好生性，仲教我猜枚，我仲keep住輸。」超儀又自爆自己向來不太喜歡小朋友，但昨日兩位小朋友都好乖。
採訪：盧妹
攝影：仇志德