英國傳媒最鍾意幫曼聯買人同賣人，好似英國《太陽報》話領隊摩連奴心目中已經有份八人嘅清洗名單，諗住喺嚟緊兩個轉會窗踢走馬高斯盧祖、達美安、舒韋恩史迪加、菲爾鍾斯、卡域克、舒尼達連、迪比（小圖）同艾舒利楊格，其中迪比喺雲高爾同摩佬麾下都踢唔出身價，有傳佢出年一月就會被借去土超嘅費倫巴治。
尋後防領袖30M斟高甸
而喺幫曼聯幫人方面，英媒呢排針對住馬德里體育會，前排傳過紅魔搵基沙文頂朗尼，早兩日就話買年輕中堅荷西基文尼斯，最新就話曼聯想羅致30歲後防大將高甸，相信未到季尾，成隊馬體會都俾人傳過要去曼聯。報道講摩佬想搵個經驗豐富嘅後防領袖喎，所以願意出3,000萬鎊（約2.9億港元）買斷高甸份約。另外，安東尼馬迪爾嘅經理人又走出嚟投訴，不滿球會今季將件九號球衣畀咗伊巴謙莫域，但伊巴件九號可能都唔會着好耐，有傳美職聯嘅洛杉磯銀河想喺出年夏天搵伊巴過檔。