特首選委會下周二接受提名，唔少專業界別同一陣營都爭崩頭，有建制派笑指此戰役過後，建制內部都因為爭位戰再分裂。而今屆選委戰焦點，就係幾多人會ABC（anyone but CY）？皆因不分陣營嘅專業界別人士都覺得梁振英任內撕裂香港，真係好難再支持得落，據知今年喺會計界領軍四大會計師樓要員出戰嘅劉麥嘉軒Ayesha高調表明No CY，率先決戰689。
睇番上屆選委會嘅結果，劉遵義太太、張國榮外甥女Ayesha都喺李家祥領軍嘅A16名單出戰兼當選。今屆李家祥據知退下火線，改由Ayesha率18人名單上陣，據聞龍佩蘭同黎嘉恩都會再披甲爭冧莊。
喺反梁氣候高漲嘅大環境下，據聞Ayesha都會高舉No CY旗幟，因為佢同一班建制派會計界都覺得刻下社會好撕裂，係時候換人重新上路，否則香港未必有運行。事實上除咗CY，坊間唔係冇其他特首選擇，好似胡官都表咗態，唔使擔心冇人肯去選，所以唔會撐CY。咁又係，若然唔夠提名入閘，咪一天都光晒？
上屆提名唐唐
當然啦，唔撐CY都有風險，一旦CY之後獲阿爺欽點咁點算？據聞佢哋覺得香港前景更重要，有傳提名期首日就會報名參選，以強勢迎戰民主派名單。值得一提嘅係，上屆會計界建制選委中，唯一得Ayesha提名唐唐咋！不過Ayesha上屆嘅選委團隊中唔少人提名咗梁振英，有份捧689上場，泛民對手相信要求佢哋票債票償。
李八方
mailto:[email protected]