試想像大笑中的黃智賢唔是講「我最期待的畫面出現了」，而係忽然古人上身，文縐縐低吟「翹首以盼終見之」；再接再厲，大家又諗諗劉江頭擰擰嘴藐藐吐出的非「講呢啲」，而係古文「曰此等」，係違和感爆錶？定係黐線地爆笑？
「譯的時候要當自己係古人，睇下點樣講出來似啲。」90後陳崇瑋（Laurent）正職為新聞繙譯，就係呢位好事之徒之前同朋友將20幾個潮語「譯」為文言文，笑到肚腩都變腹肌呀！佢仲整咗張圖等大家一覽無遺，成功憑此圖得到5000幾個like，仲有好多share！
「賭神」周潤發金句：「朋友你返印度食蕉啦」，頓變「兄台可赴天竺品蕉矣」，一句粗鄙句子變成帶點古雅的文言，反差大，笑聲更大。敢問兄台何以如斯趣怪哉？「有次同朋友傾偈，本來想講『講呢啲』，嗰刻忽然靈機一觸，想換個講法，就講咗『曰此等』，對方又明我講乜，大家仲相視而笑。」自此呢位兄台就開始譯潮語，仲一發不可收拾，不過他就話唔係句句潮語都能譯。「有啲字喺古文冇咁嘅概念，例如「柒出國際」的「柒」字，最多只能用『窘態』；又或者『又要威又要戴頭盔』算是一種oxymoron（矛盾修辭手法），很難繙譯。又例如『七日不見，如隔一周』，粵語同文言文根本冇乜分別，要譯落去有難度。」
譯潮語對他來說不算難，他曾把2012年奧巴馬總統選舉勝利宣言譯為文言文，嗰次佢查晒書，仲對埋平仄，好鬼認真。「之前見到北京一位編劇將奧巴馬演辭譯為文言文，覺得真係好流麗，於是我都狗尾續貂試吓繙譯。」譯罷佢再每句精雕細琢，令成篇文讀起來更鏗鏘。「真係會讀出聲，响電腦前好似個儍仔咁讀出來。」我表面平靜，內心翻滾，好想疾呼：「媽，好毒呀！」他說：「自己本來就頗『毒』，非『偽毒』，冇女朋友，唔似達哥。」喂「偽毒可恥」呀，唔好呃人喎，講開又講，呢句可以點樣譯？佢譯為「名訥實敏，人皆鄙之」，佢笑住話：「『訥』即係鈍，口窒窒，口齒不清都係『毒』的表現，名訥實敏即是話人表面好『毒』，實際好精。呢句就冇講佢有女朋友。一個字要包含咁多意思，好攰箒。」
潮語蛻變為文言，即使中文程度唔高，看潮語的文言繙譯，大抵都覺得跟潮語很匹配，但對於星爺金句「做人如果冇冇夢想，同條鹹魚有乜分別呀」被譯為「喪志若鮑」，琜到個頭流晒血都唔是太明白。「鮑」？真係「鮑」？原來古文「鮑」解作漬魚，亦即鹹魚。「劉向《說苑》有一句『與惡人居，如入鮑魚之肆，久而不聞其臭』，意思就係和低質的人一齊，就好似入咗賣鹹魚嘅市場，久而久之連自己都臭埋，就唔覺得鹹魚臭了。 」多謝晒，余今學甚豐（我今日真係學咗好多嘢）！
潮語精選：
你大我呀？ = 汝今恫我乎？
有錢就是任性 = 孔方在手自逍遙
朋友你返印度食蕉啦 = 兄台可赴天竺品蕉矣
我最期待的畫面出現了 = 翹首以盼終見之
講呢啲 = 曰此等
做人如果冇夢想，同條鹹魚有乜分別呀 = 喪志若鮑
這些機會不是屬於我的 = 機不我屬
Come on James, 可不可以成熟一點？ = 曉焉，詹氏，當可長進否？
記者：葉青霞
攝影：陳健邦