立法會復會兩星期，18個事務委員會到噚日終於選晒正、副主席，民主派唔同建制派協調，結果只拎到工商、環境、食安、衞生、人力、福利等6個委員會主席，其他重要委員會就畀建制搶晒，不過建制派推出嚟做主席嘅人，啲水平同能力又係咪咁掂？
就好似建制派推咗「元秋」蔣麗芸做教育事務委員會主席，第一次開會就蝦碌。
話說教育事務委員會噚日開會，元秋有建制撐，就以26票贏咗只有得13票嘅葉建源，同埋得零票、仲未宣誓嘅青政梁頌恆做主席，本身係教育界嘅葉建源，都只係做到副主席，元秋就威喇！
話記26議員名要時間
不過元秋主持會議，連議員啲名都唔多記得，好似同屬建制派嘅工聯會何啟明，元秋提起佢時，都要先問一問：「何啟明係咪呀？」
咁何啟明又少上電視少見報，元秋唔記得都唔奇，但連成日見報嘅立法會「高佬」民主黨林卓廷，元秋都唔認得先至奇！阿廷噚次舉手提問，元秋噏唔出佢個名，只係用「仲有一位議員」代替，連佢自己都好尷尬補鑊話：「啊，係阿廷，見多幾次面就記得！」又話自己突然要記住26個新議員名都要時間喎！
其實搵得建制派做主席，西環唔志在有冇能力，至緊要關鍵時刻識say no就得！好似葉建源噚日想傾吓對日後嘅教育局局長需要乜條件，擺明向現任局長吳克儉開拖，元秋唔肯即時答應，仲話費事俾人話立法干預行政！呢啲咪政府、西環眼中嘅「好主席」囉！
李八方
mailto:[email protected]