今年立法會選舉嗰陣，郵政署幫手篩選候選人嘅單張，民主派當然鬧爆啦﹗不過選舉過後，郵政署一樣俾人鬧爆，不過今次係俾民建聯葛珮帆（圖）鬧！話說葛珮帆噚日收到一封寫住來自「香港台灣靖國神社崇敬奉賛會」會長張建國嘅信，內容大致係支持港獨，力挺青年新政梁頌恆、游蕙禎「侮辱汝等支那鬼子」。不過封信仲話南京大屠殺係揑造，而且郵寄嘅地址係「香港國金鐘立法會大樓」。
呢封信又「香港國」、又辱華，葛珮帆梗係嬲爆，仲話要寫信郵政署長投訴，認為個地址咁寫法係違反《基本法》，要求郵政署緊守《基本法》、捍衞一國兩制，檢討處理郵件機制。葛珮帆仲同八方講，就算封信係惡作劇都太過份，萬一嚟真嘅直頭係明目張膽咁搞港獨，梗係投訴啦﹗咁大條罪名壓落嚟，怕且郵政署又要解畫！