林心如同霍建華呢對俊男美女，今年7月底喺峇里舉行婚禮，當時已經傳心如有咗「華種」，不過佢哋一直避談呢件事，直到9月出席活動開腔認懷孕。
正當心如、霍建華同埋啲朋友都好期待BB來臨之時，昨日林心如工作室喺微博發咗一個聲明，原來近日有網民留言抨擊心如，唔止話佢當日係主動追霍建華，仲有好多留言係詆毀兼人身攻擊添。心如啲同事話其實佢哋一早已經想發聲明，但係心如覺得自己冇做過呢啲嘢，所以唔怕人哋講啲乜。但係大家都覺得呢個情況越嚟越嚴重，所以佢哋最後決定出聲明，兼且將啲留言cap圖，仲話：「雖然作為藝人，私生活被拿來討論在所難免，然而這些言論的出現，除了呈現出網路暴力越演越烈的現象外，也表現了此類言論者對女性的一種根深蒂固的歧視，在婚姻問題上，難道女性永遠都只是被選擇？請不要把自己的觀念強加到別人身上。」
聲明還寫道：「我們會對此類不法言論發佈者保留法律追責的權利，由北京星權律師事務所進行取證並採取相關法律措施，以正視聽。」有唔少網民留言支持心如，但亦有人覺得身為老公兼爹哋嘅霍建華，好應該為呢件事表態。