老闆看見下屬忽然「停晒手」望住文化發呆，不要立即指罵，因為發呆原來有助增加生產力。國家衞生和計劃生育委員會疾病預防控制局及中國健康教育中心等單位，首度推出「5125」健康生活理念，包括建議民眾每天要發呆5分鐘、做一小時運動、按建議每日攝取12種以上食物，並每周攝取25種以上食物，做到膳食多樣化。本港精神科醫生表示，上班族在長時間及緊張的工作中，抽出五分鐘發呆或hea吓，可讓腦部休息，踢走焦慮或抑鬱，有助提升工作效率。
記者：陳沛冰
精神科專科醫生李德誠表示，不少人每日工作時忙得透不過氣，覺得「齋坐唔做嘢」是浪費時間，但其實腦袋不停運作，沒有足夠休息，容易引起焦慮或抑鬱，內地經濟發展急速，「啲人博得好盡，有時過咗龍唔平衡，容易引起精神健康問題，發呆五分鐘係好開始」。
發呆是讓腦袋有機會停一停，抖一抖，將自己由繁重的工作抽離。李指，讓腦部休息不一定是發呆或發白日夢，不同人有不同方法，「離開個位去茶水間吹水、飲咖啡、有人聽歌、有人去後樓梯鬧老細、落公司樓下行個圈」，甚至深呼吸或拉筋，可以鬆弛肌肉及放鬆情緒。瑞典規定僱員每工作一小時可享有五分鐘休息時間，很多公司給予員工早上三小時工作中，有15分休息時間，僱員回氣後再工作，反可增加生產力。
李指，若發現自己不能發呆，是一個警號，「俾五分鐘佢都抽離唔到，擔心呢樣又覺得個樣未做，俾五分鐘佢仲衰，仲諗好多負面嘢，諗到好似天跌落嚟」，這樣可能是情緒不穩、屬過份焦慮或有抑鬱傾向，有需要時要求醫。
想輕輕鬆鬆健康?，記住留意健康蘋台
http://health.appledaily.com.hk/