剛宣佈參選特首嘅「胡官」胡國興（圖），一向畀人感覺係好重視中立同不偏不倚，好似佢噚日去電台接受訪問，自爆94年處理完選舉後，獲當年委任佢做選管會主席嘅港督彭定康邀請去港督府食飯。胡官話，肥彭屋企的飯餸好好味，不過佢食完嗰餐就叫肥彭以後唔好再請佢食飯，因為唔想俾人懷疑肥彭指示佢做事，影響佢選管會主席嘅中立性，而自此之後到97年回歸，肥彭未再搵佢食過一次飯喎。
講起約食飯，胡官就話原來唔係想像中咁易，佢話自己就參選特首約見政黨，第一個見係經民聯啲朋友，之後亦見過民記創黨主席曾鈺成、民主黨、工黨、公民黨余若薇等，不過佢試過先知，唔係個個咁易約，例如自由黨田少，佢就打極電話都搵唔到，最終改為約見新主席張宇人。胡官本來又想搵民主黨主席劉慧卿，但卿姐電話又係冇人聽。