訪台陸客銳減，當地旅遊業界叫苦連天，苗栗縣縣長徐耀昌（圖）噚日仲親自飛到嚟香港，推銷為港人度身訂做、由兩日一夜至三日兩夜嘅自由行套餐，每位1,738元至2,988元，希望吸引更多港客可以撐住苗栗旅遊業。
徐縣長同八方講，雖然陸客減少，但訪苗栗嘅港客以倍增加，遂推港人專享優惠套餐，除咗中華航空香港飛桃園機場來回機票，仲包埋桃園站至苗栗站嘅高鐵來回車票、兩天一夜全程專車導覽（兩日一夜套餐只有台灣好行套票），希望𠵱家生活緊張港人放鬆心情慢遊、慢食，唔使再擔心交通接駁嘅問題，故自由行套餐叫「愛上苗栗 相約慢城」，「港人輕鬆在苗栗採果、泡溫泉，品嚐正宗客家菜。」