立法會選戰啱啱過去，但文化藝術界就即將出現另一場選戰，就係新一屆藝發局委員選舉。
今次比較矚目嘅，除咗係音樂人周博賢會出選音樂範疇，挑戰創局元老、歌唱家費明儀之外，仲有就係演員黃秋生（圖）同演藝學院表演藝術教育主任李俊亮競逐戲劇範疇。
八方噚日就收到黃秋生嘅公開信，提到佢嘅參選政綱，包括爭取設立「舞台設計及技術」藝術組別、倡議設立「劇團環保倉」用廢置校舍設迷你倉庫畀劇團放物資。
黃秋生話今次自己出嚟參選係因為演藝校友會推舉，佢希望用演員、獨立劇團藝術總監同演藝校友會榮譽主席嘅三重身份，凝聚業界力量，為同業爭取權益。
話說黃秋生上屆成功將連續三屆自動當選戲劇範疇嘅古天農拉落馬，唔知今屆佢又可唔可以成功連任呢？