立法會上星期五開完內會，大批傳媒追住陳維安和李慧琼訪問，再加埋上星期三立法會大會期間，大批傳媒湧入會議廳，立法會噚日開內會即如臨大敵，喺二樓走廊突然加設圍欄，將通道分成記者區同議員通道，不過記者仍可自由喺走廊採訪，而立會委員會開會期間，仲有多名保安監察議員出席情況，通報未宣誓嘅議員有冇現身。
立會大樓突然守衞咁森嚴，民主派議員梗係嬲，民主黨林卓廷就批評，秘書處設圍欄安排係多此一舉，認為記者應有自由採訪權利，加設圍欄反而更易絆倒記者，構成危險。
咁八方問立法會秘書處，佢哋為乜咁搞，秘書處話因預料會有唔少傳媒採訪立法會內務委員會會議，為便利議員進入會議室，同埋方便傳媒有秩序及安全地進行採訪工作，先有呢項臨時措施。