雖則建制同非建制陣營早前就18個事務委員會正副主席選舉拗唔掂數，各方都冧友喺委員會，講到打仗咁滯，但觀乎周二舉行咗嘅13個委員會改選，5個由非建制議員喺冇挑戰下任主席，即係同開戰前嘅協調差唔多，似乎呢場大戰只係姿態戰，一如建制派班長廖長江所言「唔會太盡」。
而噚日進行正、副主席選舉嘅財務委員會轄下人事編制小組同工務小組，據聞建制一早協調好由新民黨葉劉淑儀同經民聯盧偉國分別出任主席，副主席則會放行畀泛民擔任，結果公民黨楊岳橋（圖）挑戰葉劉主席位失敗後，無人挑戰下任人事編制小組副主席，同葉劉一齊拍住上。專業議政莫乃光則喺工務小組主席選舉輸咗畀盧偉國後自動當選小組副主席，呢個結果對兩邊陣營似乎都係意料中事。