神奇小子曹星如前晚擊敗日本選手，攞到職業生涯20連勝，估唔到呢場比賽都成為特首熱門人士爭勝之地。一如所料，雙曾出擊，所向無敵，facebook圖文並茂贏盡掌聲；任憑梁特點樣努力，似乎唔可以逆轉勝。
財爺外訪睇直播
盛傳如果財爺曾俊華做特首、有可能成為政務司司長嘅前立法會主席曾鈺成，周六晚近9時喺facebook貼相留言，「與5,000人一起逼爆會展撐曹星如、撐香港」，原來親自入場撐神奇小子；因為外訪而未能再度親身捧場嘅「習握手」鬍鬚曾呢，身在外地但心繫星如，當晚10點喺facebook轉載拳賽直播片段，留言「My heart is with you, though we are in Washington. Keep on fighting!」獲得網民激讚。
反之蓄勢爭連任嘅梁特呢，喺曹星如勝出後約晚上11點幾先喺facebook祝賀對方，讚對方「打出香港人的拼搏精神。衷心祝賀曹星如」，可惜同人唔同命，佢出po嘅結果，又係惹嚟大批網民嬲嬲豬。
仲唔止喎。鬍鬚曾噚日仲喺網誌玩軟銷，回首30幾年嘅公務生涯，覺得精采而滿足，仲話當年決定回港嘅決定，換來半生不可多得嘅奇妙旅程；而自己回流除咗希望用所懂所學貢獻社會，仲希望身體力行，畀下一代喺自己嘅土地成長，令佢哋更加了解國家嘅歷史同文化，熱愛自己嘅家。呢番本土之言，再度KO噚日喺Formula E被噓嘅CY。
李八方
mailto:[email protected]