立法會秘書處喺10月1日、即係前日喺網站上載新一屆議員履歷，《香港01》好眼利，率先發現其中嘅學歷申報資料甩漏極多，例如新東容海恩自行升呢，喺學歷及專業資格一欄報稱係「香港城市大學法學博士」，同其過去所稱就讀嘅「城大法律博士（JD）」不同；而碩士學歷資格被質疑嘅民建聯柯創盛，冇填寫學歷及專業資格、甚至連職業同所屬政治團體都冇喎。
容海恩回應《香港01》查詢時指自己喺2004至2006年修讀「城大法律博士」，清楚知道「法律博士（Juris Doctor，JD）」同「法學博士（Doctor of Judicial Science，JSD）」唔同，對立法會網頁將自己寫成較高學歷嘅「法學博士」感到驚訝，由於唔係自己填，可能係助手或立法會職員寫錯。
泰博串錯變Tuen Mum
而柯創盛聲稱曾經入讀英國Nottingham Trent University嘅工商管理碩士課程，但早前有報道話校方紀錄中搵唔到佢個名，唔知係咪因此唔申報住？
噚日網民又有新發現，喺新西當選嘅熱血公民鄭松泰雖然曾經喺北京大學修畢社會學博士學位，但泰博嘅申報欄未見此資料，而且將社會學（Sociology）同屯門（Tuen Mun）嘅英文，分別串錯成Sociolosy同Tuen Mum。由於議員填寫申報表後，由立法會秘書處職員上載資料至網站，暫時未知係泰博定係秘書處手民之誤。
對於議員資料錯漏甚多，立法會秘書處回應話，會重新檢視所有議員資料，如資料錯誤因秘書處輸入所致，謹此致歉，會盡快修正喎。立法會網頁噚晚已經改正英文錯字，同時將容海恩學歷改返「法律博士」。
李八方
mailto:[email protected]