特首梁振英成日話要發展創新科技，但連自己一個小小facebook賬戶都未管得掂，今次係唔識貼link，佢想喺fb分享一條政府宣傳短片，反而仲惹來「播毒」疑雲!
資訊科技界候任立法會議員莫乃光喺fb鬧爆梁特呢個post，佢話「這個post好垃圾，一個video乜形容都無都算了，到𠵱家仲未識喺fb post video都算了，點解要用條咁嘅link？驚死人唔知香港政府用Cloudflare，仲幫人賣埋廣告？」
梁特約於中午po呢條link，去到夜晚，佢依然冇處理條link，由佢孤零零喺度。華華惟有冒住可能電腦中毒嘅風險，㩒入去下載個file，睇下佢係乜東東，打開先知道呢條片係介紹政府啟德工貿大廈嘅環保設計，使唔使咁神秘呀，真係好驚開咗會中毒囉。
難怪莫乃光hashtag「#幾百萬請條友連喺FB上載個video都唔識」。據了解，梁特嘅fb管理員，就係日薪過萬元、曾自比「白宮發言人」嘅馮煒光。馮上任以來已經製造唔少「關公災難」，包括幫梁特秘交女優朋友，特首辦發聲明話被黑客入侵，後來俾網友用截圖踢爆，馮煒光反駁話有人改圖抹黑。