被認為係拿姆接班人嘅甘美治腳風好順，近七場入五球，但幫唔到拜仁上周六喺德甲主場贏科隆，最終逼和1:1，主帥安察洛堤亦平唔到德甲開季六連勝紀錄。拜仁痛失兩分，多蒙特亦把握唔到機會拉近距離，同日作客利華古遜，唔知係咪歐聯硬撼完皇馬太攰，最終俾主隊前鋒美密迪同查維亞靴南迪斯（小豆）各入一球而輸0:2，小豆近五場比賽入六球，狀態勁「弗」。