油尖旺區鼠患問題一向嚴重，淨係睇九龍西立法會議員梁美芬有個外號叫鼠王芬就知！油尖旺區議會食物環境衞生及工務委員會噚日開會，商討點樣滅鼠，在場部份區議員好不滿食環署𠵱家嘅滅鼠方法。
建議叉燒味藥餌引鼠
民建聯區議員關秀玲話喎，𠵱家用緊嘅老鼠藥用處唔大，佢唔知喺邊處搵到靈感，建議政府研發魷魚味同叉燒味嘅老鼠藥，話或者可以吸引老鼠食。另一個出席會議嘅增選委員歐陽秀明就建議學外國將乾冰放喺鼠洞外，又或者用二氧化碳（CO2）令老鼠缺氧死亡。
食環署油尖區環境衞生總監黃錦華聽到有議員建議研發魷魚味同叉燒味嘅老鼠藥，仍然非常認真咁回應，話現時嘅毒老鼠餌已經加油加糖吸引老鼠，但係為免野貓誤食，鼠餌屬於慢性毒藥，老鼠服食多次先會內出血死亡，仲承諾會檢討老鼠藥成效、劑量同配方。
黃錦華冇正面回應係咪會研發魷魚味同叉燒味老鼠藥，不過佢補充，𠵱家捕鼠籠入面已經有用魷魚做餌，引老鼠中招。