英聯賽會真識抽，英聯盃16強嘅收視一定有保證，不過香港暫時冇電視台播英聯盃！摩連奴領曼聯前晚以3:1擊敗諾咸頓，16強就抽到下籤，要對佢命中注定嘅對手，即係曼城嘅哥迪奧拿。
福仔神勇朗尼嘔血
曼聯之前三連敗，嚟到周三嘅英聯盃第三圈，作客英甲嘅諾咸頓，終於可以回吓氣。摩連奴呢場輪換主力，卡域克代保羅普巴踢中場，呢位老將唔止控制節奏一流，喺17分鐘仲幫球隊開紀錄。雖然半場前俾諾咸頓追平，但摩佬換邊後換入伊巴謙莫域同拉舒福特，甲組仔即刻唔掂。安達靴里拉同拉舒福特各入一球，幫曼聯作客贏3:1晉級。拉舒福特真係處子戰之神，呢次佢首次踢英聯盃就有波入，之前佢首戰英超、歐霸、國際賽都即刻有波入。
摩佬寸周街「愛因斯坦」
除咗福仔外，淡定嘅卡域克同埋勤力嘅靴里拉都值得一讚，至於邊啲人踢得差？唔難估啦，左閘馬高斯盧祖繼續做雪糕筒，至於隊長朗尼今場踢前鋒，延續上場嘔血表現，冇腳好波。朗尼呢場踢足90分鐘，相信係個好消息，估計佢喺周末對李斯特城嘅聯賽會輪休做後備。福仔話過自己踢10號位都掂，唔知摩佬下場對李城會唔會考慮吓佢呢？
曼聯呢場贏波，摩佬牙擦嘞，反擊傳媒同網民，寸我求大俠呢啲口水佬同鍵盤俠係球壇愛因斯坦，「我哋度過咗慘情嘅一星期，令我知道世上有好多愛因斯坦，佢哋無視我過去嘅履歷同埋曼聯多年嚟嘅歷史，淨係針對三場輸波。但呢個世代嘅足球就係咁，周圍都係愛因斯坦。」完場後，英足總為英聯盃16強抽籤，真係不是冤家不聚頭，曼聯抽中對曼城。之前英超曼市打吡，曼聯主場以1:2輸波，唔知呢次係畀機會摩佬復仇，定係等哥迪奧拿完勝多一次呢？英聯盃16強連場大戰，利物浦鬥熱刺、車路士作客韋斯咸；阿仙奴領隊雲格就最開心，喺主場對雷丁，易食指數爆燈，家陣兵工廠冠軍賠率係5倍，同紅軍一樣係冠軍大熱。