周三西甲聯賽，兩大豪門皇家馬德里同巴塞隆拿都食悶棍。兩隊和波失分之餘，皇馬創唔到西甲連勝新紀錄；巴塞仲慘，主力美斯又受傷，估計要休戰三星期。
巴塞喺主場鬥馬德里體育會，拿傑迪錫喺完半場前開紀錄，不過到61分鐘就被馬體會嘅安祖哥利亞扳平。兩大勁旅握手言和，戰果其實對巴塞嚟講唔算太壞，但喺巴塞被扳平之前冇耐，美斯因為拉傷鼠蹊要換出。球會賽後公佈話，預計美斯要休戰大概三個星期，踢唔到嚟緊兩場西甲同埋一場歐聯；阿根廷國家隊就慘啲，下輪世盃外又唔使預佢。
BC復出皇馬照和
皇馬喺主場迎戰維拉利爾，雖然有基斯坦奴朗拿度同加里夫巴利復出，但都係贏唔到。中堅沙治奧拉莫斯喺完半場前禁區犯手球輸12碼，累球隊先失守，但佢喺換邊後三分鐘頭槌破網將功補過，雙方最終各一言和。皇馬跨季聯賽16連勝到此為止，刷新唔到西甲連勝紀錄。