真係可喜可賀，喺南華會保齡球場舉行嘅亞洲保齡球錦標賽，港隊真係做到日日有牌攞！麥卓賢繼前日攞到個人賽銅牌，噚日佢拍住大師兄胡兆康出戰雙人賽，兩人由頭帶到尾，最後打完六局以2,708分力壓兩對馬來西亞組合，攞到合作六、七次以嚟第一面金牌，難怪佢哋贏完金牌後都要攬攬（上圖），互相祝賀吓喇！
康仔強忍骨膜炎奪金
更難得嘅係，31歲嘅康仔近排練習搞到右手手指出現骨膜炎，佢話比賽呢幾日嚴重咗，好彩比賽時頂得住。呢對金牌組合嚟緊會聯同劉冠濠出戰三人賽，今日先打頭三局，希望聽日又有牌攞。已經有兩牌喺手、22歲嘅麥卓賢話好有信心可以再攞牌，佢下個月會出戰世界盃，今次亞錦賽攞到咁好成績，對佢嚟講，絕對係支強心針！