高難度動作，點只後生仔先有？遠在英國蘇格蘭格拉斯哥、一名來自香港嘅婆婆亦都藝高人膽大，喺冇安全措施嘅情況下，企喺5樓嘅外牆抹窗，呢一幕驚險吊吊揈場面，被當地居民影低放上網，令呢位婆婆做咗網絡紅人。
擒出5樓外牆抹窗
英國《每日鏡報》報道，呢位網絡紅人係76歲嘅毛金娣（Mo Kam Tai，音譯），25年前由香港去到格拉斯哥，喺當地華人社區相當活躍。毛金娣唔做任何安全措施、就咁站喺外牆狹小濕滑邊緣抹窗嘅一幕，被人影低並分享到互聯網，拍攝者仲將稱之為「格拉斯哥式抹窗」。
報道引述毛金娣話：「保持你屋企同窗口嘅清潔好重要，任何女人都會咁話你聽。」佢從來都唔佩戴安全帶，試過有次將自己反鎖喺外邊，甚至要由鄰居救出㖭！佢囝囝透露：「從來冇嘢可以阻止媽媽做家務，就算我哋成日叫佢唔好行到窗邊，佢都唔理我哋。」但今次成為網絡紅人，反而令毛金娣有啲唔同想法：「我諗我應該聽我個仔話唔再抹窗，不過我從來唔怕高或者辛苦。」