咪以為食齋就可以瘦身保持健康，年屆71歲嘅寶蓮禪寺健釗長老話你知，以前冇做運動，朝早唔願起身，影響晨課修行；讀中學時已愛運動嘅心慧法師則話，出家人十個有九個體形圓潤，皆因冇乜做運動。
人稱毅行者先生嘅退休消防員陳國強，就喺兩年前每年舉行嘅一百公里毅行者活動同健釗長老結緣，奉勸出家人都要放低嚴肅一面，參加跑步。佢話跑步不在於勝負得失，而在於身心調和。健釗長老聞言頓悟，去年舉辦寶蓮襌寺首屆佛你跑慈善越野跑，逾千人參加，於是今年11月5日舉辦第二屆佛你跑。
今屆除咗親子組合同長者，仲呼籲太太們參加罰你太太跑、即係「佛你太太跑」。噚日有5名過去只管相夫教子，閒來打幾圈嘅太太團現身說法，講吓點樣參加撒哈拉250公里超級馬拉松挑戰賽。活動詳情可參閱 http://BuddhaYouRun.org.hk