星期五(23號)就39歲生日嘅澳洲猛將柏寶，當然希望於生日前夕的周三晚(21日)快活谷夜賽有頭馬慶生，其中頭場四班1800米，柏寶會策騎「寶正寶」，無論贏輸都會係焦點，事關「寶正寶」是柏寶相隔近一年後再次為姚本輝馬房效力。
前馬王「蓮華生輝」曾經為柏寶、姚本輝呢對騎練帶嚟唔少榮譽，但上季兩人關係不再密切，全季合作次數銳減至3次，對上一次已經係去年9月28日「根深柢固」跑第10，之後冇再走埋一齊。相隔約一年，今戰的「寶正寶」服役兩季跑咗29場得4亞2季，仲未出頭。柏寶接受訪問時指出，「寶正寶」近期狀態唔差，上星期二由他泥閘跑尾二，皆因當日志在畀「寶正寶」輕舒步頭，並冇認真考驗隻馬，叫大家唔好在意那課閘的名次。
再查一查，柏寶同輝哥對上一次攜手贏馬，已經係2014年元旦日嘅「百年歡」，這對騎練今季均未開齋，如果今次柏寶能夠幫「寶正寶」取得處女勝利，肯定意義重大。