香港打工仔每年大假十日鬆少少，儲假去旅行慳得一日得一日。有美國調查發現，原來購物碌卡都浪費好多時間，如果好似美國人咁，平均一日碌卡4次，每年就損失接近6小時，足足冇咗半日大假！
從事支付科技嘅機構Cayan表示，目前信用卡碌卡處理時間，介乎12秒至16秒不等，當中未計信用卡付款時簽名步驟，而每名美國人每日平均透過信用卡進行4單現場交易，因此每名美國人一年就平均浪費接近6小時呆等信用卡交易處理。
調查未有提美國以外情況，至於香港人，當然未必每日平均用信用卡碌卡4次咁多，不過，當出外購物時，遇正排隊情況的話，只要排喺前面有顧客用信用卡付款，亦變相增加閣下排隊時間。例如去到超市，排隊付款時，前面4名顧客都用信用卡付款，浪費的時間等同於自己以信用卡進行現場交易4次咁多，只要每日發生此情況，亦同樣一年浪費半日大假。