星期日立法會選舉塵埃落定，小弟最欣喜係香港市民嘅積極性，票站原本10點半關閉，但因為場地、人手問題，搞到過咗鐘都仲有大批選民未完成投票，最後要延長投票時間。
據報最後一位選民等到凌晨三點，唔係為咗捉精靈，唔係為咗排隊買限量版波鞋，只不過為咗盡公民責任，真係抵讚，希望呢個良好習慣可以延續落去。
講開勝負，新一屆立法會都多咗好多新人，有BB、有學運領袖、有Judy，連建制派都硬銷個所謂翻版桂綸鎂、實際似馬海倫嘅新人出嚟。坦白講，政黨仲玩論資排輩真係out晒。
西班牙國家隊就好似啲老牌政黨，始終就比較保守，就算換咗教練，新一輪國際賽大軍都熟口熟面。自從沙維、恩尼達斯相繼老退後，大衛施華（紅衫）終於做到西班牙中場大佬，不過其實都已經30歲。過去因為小白在陣關係，搞到施華喺國家隊嘅位置都幾尷尬；要做中場派牌，就要做小白後備，以佢嘅級數真係浪費晒，但係推上做輔鋒，速度就及唔上柏度洛迪古斯等傳統翼鋒，變相拖慢球隊效率。好彩家陣西班牙換血擔正之餘，新一季曼城領隊哥迪奧拿亦繼續重用施華，真係更上一層樓。
西班牙啱啱兩場國際賽全勝，施華就交出四個入球同一個助攻，而曼城新一季三連勝，施華喺中場領軍亦可圈可點。小弟認為，如果伊巴謙莫域係曼聯開季最佳球員，車路士係夏薩特，曼城就係施華。坦白講，以家陣咁講求攻守效率嘅足球戰術，連夏薩特同奧斯卡杜斯山度士都俾摩連奴逼到要做防守，施華呢種瀟灑踢法真係越嚟越少見，當然就算佢咁弗，都要有一個畀好大自由度嘅領隊，就係哥迪奧拿。
文：牽牛