今年立法會選舉投票率高達58%，投票人數逾二百二十萬，破晒歷屆選舉紀錄，可見香港人並非政治冷感，梁振英上台四年，刺激到好多香港人神經線，加上兩年前佔領運動喚起男女老幼對政治制度之醒覺，更多人珍惜要投下一票之權利。
左丁山在星期日本想夜晚食完飯，睇吓有乜消息先，才去票站投票，好彩老婆不耐煩，未夠五點就捉左丁山出門，到票站係要排隊，但十幾分鐘之後就輪到，唔算耐，後來睇新聞知道有啲票站在八九點後排晒長龍，暗呼一聲好彩。
選舉日由朝到晚都收到WhatsApp，一派話做立法會議員四年，穩袋1662萬元，投票前要嚴格審查，呢啲係人云亦云嘅退休人士傳過嚟嘅，亦有一位不知何許人也，但電話係+86-152-2022-XXX傳過嚟嘅，分明有人組織，但呢啲組織將大話講過龍，違反常識（不過或者呃到一啲老人都唔定），因為立法會議員月薪係93040元，乘48個月，再加15%約滿酬金，總數係5135808元箒，何來千六萬呀？但有人為咗砌低非建制派議員，唔顧得咁多咯。一位朋友嘅奶奶仲收到電話：「記得叫N先生去投票俾工聯會，第XXY號呀。」奶奶答：「我老公人在天堂，點投票呀？」對方立即收線。
組織中人咁努力拉票，但中聯辦似乎已唔再睇啲基層工人，只係注重與泛民鬥搶專業人士，尤其是法律界人士──大律師與律師就最啱。先叫陳婉嫻退休，又逼退鍾樹根（民建聯），然後捧出張國鈞（律師），新人物容海恩大律師，招安前律師公會主席何君堯律師，捧英國留學嘅周浩鼎，捨棄爭取連任嘅工聯會王國興與鄧家彪，如果你係工聯會老幹部死忠份子，心唔心淡？到咗下午，又有民主派傳來投票貼士，港島4號、5號；九西8號、3號；九東8號、9號；新西2號、10號；新東7號、2號；超區801、803，老婆問：「跟唔跟呀？」左丁山答：「合心水就跟，不合則照自己偏好投票。」好嘞，第二朝（9月5日）睇結果，午飯時知道晒五區直選結果，咦，上述泛民投票提示中晒喎，全部當選，只係801涂謹申可能過票太多俾803鄺俊宇，搞到涂謹申贏得非常牙煙，只係贏西環棄將王國興短馬頭，驚足成日，相信依家還要食緊驚風散！