新一屆立法會選舉喺本周一塵埃落定，政黨呢幾日輪流舉行記者會，檢討選情；當選者呢，就四出謝票，唔會比選前更輕鬆！之但係喺醫學界擊敗黃以謙當選嘅陳沛然呢……呢幾日好似突然間消失咗咁，一直無聲無息，原來佢當選之後，即刻感冒病咗！
八方試過打電話畀陳醫生，佢無聽電話，只係以短訊回覆話，自己由周一病到今日（昨日），都仲未病好，「無奈一臉病容，喉痛聲啞」，不過呢兩日仲有返工嘅！
查實陳沛然周一當選後話過呀，今個月係「月全食」，點解？皆因贏咗選舉，梗係要逐個逐個請食飯，多謝提名人同兄弟姊妹支持啦，而淨係提名人嘞喎，已經有成18個咁多，即係可能要食足18餐，唔好忘記仲有病人組織喎。唔知陳醫生病到咁，使唔使推遲「月全食」大計呢？