上市公司商會噚日下晝舉行論壇，辯論備受爭議嘅上市架構改革諮詢。雖然論壇3點開始，當時未收市，又開成3個鐘咁多，都有大約200名業內人士出席，場面好墟冚。
商會主席梁伯韜、副主席羅嘉瑞講笑，話佢哋已經半退休，又冇乜公職，所以唔怕暢所欲言鬧監管機構，又大讚摩根大通董事總經理兼香港環球投資銀行部主管劉伯偉（David）有guts，唔怕出嚟唱反調之後俾人秋後算賬。David就苦笑話，唔知自己係最勇敢定係最不幸。
其實全中環都知David有guts㗎啦，大家仲記唔記得2014年10月雨傘運動期間，當時《壹錘定音》主持李慧玲落金鐘佔領區做直播訪問，訪問李柱銘與學聯代表梁麗幗，忽然間有位「挑機男」打斷訪問，一輪嘴發表兩分鐘政見，呢位「挑機男」咪就係David囉。
可惜噚日證監會、港交所（388）都冇派代表出席，反而張華峰、詹劍崙兩位歡喜冤家竟然雙雙應邀出席。
張華峰可能趕住去謝票，到場10分鐘左右就閃，詹劍崙就由頭坐到尾，咁都啱嘅，詹劍崙一直反對呢項改革，冇理由輸咗立法會就冇影，要繼續代表業界出聲吖嘛。
李華華
mailto:[email protected]