如果葡萄牙家陣仲沉醉喺歐國盃冠軍，就真係大錯特錯嘞，事關兩年後嘅俄羅斯世界盃外圍賽都殺到埋身。堂堂應屆歐國盃冠軍，周二仍然有基斯坦奴朗拿度（C朗）缺陣下，作客瑞士打多一個人都輸兩粒，真係落筆打三更。好彩葡軍都有人陪，歐國盃亞軍法國作客都係悶和白俄羅斯0:0，「銀河唯一」基奧特又做敗家仔。
C朗缺陣吞瑞士雙蛋
葡萄牙始終改唔到慢熱呢個壞習慣，好似歐國盃外圍賽，葡軍都係第一場輸波，講番歐國盃決賽周，更加喺分組賽未贏過，不過最終都攞冠軍創歷史。周二作客瑞士，都算係世盃外B組最大對手，不過冇C朗呢個靈魂人物始終爭啲，瑞士喺23分鐘已經把握葡軍門將魯爾柏迪斯奧擋出射門不遠，由史浩克04前鋒比列安保路頭槌補中，先開紀錄。七分鐘後，利華古遜前鋒美密迪妙射建功，瑞士由一對德甲孖寶贏到2:0。換邊後，葡萄牙老大哥拿尼頭槌中柱，失去破蛋機會。補時階段，瑞士雖然有中場格列沙加兩黃一紅被逐，不過仍然保住不失，分組賽旗開得勝。
葡萄牙教練費蘭度山度士幫國家隊奪得首個重要冠軍，當然續約留隊領軍戰世界盃，今次出師不利，對佢帥位暫時都影響不大，山度士賽後就話：「其實開賽頭15至20分鐘，我哋都控制戰局，不過對手一次攻門入到波。無可否認，我哋表現及唔上歐國盃決賽周，冇咗一啲鬥心，我哋唔可以以為一定會出線，任何事都會發生。」
基奧特敗家累法國失分
歐國盃決賽加時輸畀葡萄牙嘅法國，亦都要收拾心情出戰世盃外。法國編入A組，首戰對白俄羅斯，阿仙奴前鋒基奧特做敗家仔，錯失兩次黃金機會，包括下半場頭槌頂中楣，只能悶和0:0。A組實力都幾平均㗎，首輪帶出嘅竟然係保加利亞，佢哋主場4:3險勝盧森堡，荷蘭就作客賽和瑞典1:1。