最低班的五班賽係護級平台，唔少低分馬長期表現低迷有出局危機，練馬師惟有盡量幫佢哋打王牌報名出賽，希望搏得一場搏一場，幫佢哋拎得一分得一分。
這晚快活谷第三場五班1650米，12匹賽駒全數有王牌在身，爭出賽資格爭到頭崩額裂咁滯。結果方嘉柏馬房「事必獲利」後上突圍贏咗，此駒上季尾轉投方廐三戰一季，今季去到六歲之齡，呢鋪用潘頓沿途居中，半條直路於外欄後上如入無人之境，就此4.8倍次熱開齋，組合獨贏A1派26元正，方嘉柏打開新季度勝門，潘頓則連勝兩日未斷纜。
藝人陳豪和老婆生咗三個小孩仍未收身之陳茵媺拍拖現身，加上馬海倫，今場為馬主方中的冷馬「萬醒仔」打氣，可惜此駒轉彎蝕位不少，既不敵頭馬「事必獲利」，亦追不過亞軍馬「鼓浪飛星」，結果「萬醒仔」只得季軍，不過陳茵媺仍high到爆，大聲嗌馬並振臂歡呼，似乎很滿意賽果，「萬醒仔」位置每10元派46元，莫非陳豪夫婦大有收穫？而第四名是「公証揚聖」，四重彩派七萬九千幾。
今場直路走內欄冇運行，好似雷神座騎「識飛」咁，一直俾外側「原始寶石」阻擋去路，未能全力施為，就此大熱倒灶跑第五。
方嘉柏指「事必獲利」上季尾曾在谷草1200米上名，其實牠跑谷草一哩更合，今季在五班起步評分有利，加上場地起變化更合發揮，很開心為此匹轉倉馬取勝。