上周六沙田跑完開鑼日馬，這晚周三輪到谷草跑開鑼夜馬，結果第一場五班1200米，徐雨石馬房憑「天狼星」在徒弟黃皓楠胯下勝出今季首場谷戰，單Win及組合獨贏A1，分別派39.5及22元。
徐雨石、黃皓楠兩師徒可謂旺氣逼人，連同開鑼日的佳績，目前徐雨石累積四Win，黃皓楠則有三Win，分別領先練馬師及騎師榜。六歲馬「天狼星」長跑長有，上季14戰僅四次唔入前五名冇獎金，今場藉1檔之利，沿途居前下贏四分三身位，以大熱門身份首勝谷戰，連帶馬主貝鈞奇在新馬季亦有好開始。
呢場跑第二係與男友新婚的王賢誌愛駒「大將風速」，跨季連續三仗全跑亞軍，仍未能打開勝門，此駒練騎係另一對華人師徒何良及蘇狄雄，搭番「天狼星」呢條華倉Ｑ有14倍，位置Q則係4.7倍大熱。今場三、四名分別為「明多多」及「智能」，四重彩派六萬七千幾。
徐雨石指「天狼星」今仗贏在好形勢，「欖球鑽石」在嘉琦胯下早段扯得好快，「天狼星」1檔輕鬆跟隨有利。至於馬主貝鈞奇指「天狼星」今季大器晚成，更為成熟，與黃皓楠好夾，楠仔發揮亦出色，加上下雨令場地鬆軟，亦有幫助。