兩位靚女公關A與公關B好客氣，趁中秋將至，要送月餅俾左丁山，仲要去Island Tang吃午飯交收。左丁山當然年紀大佢兩位好多，有時老氣橫秋，見到面就對佢地多講幾句，其實只不過係隨口噏，當秘笈，點知兩位靚女當係公關真經，要送月餅以表謝意，自己就認為受之有愧。
A與B都話做公關要EQ高，總要笑臉迎人，應付到人客與傳媒之餘，老闆CEO嘅面色都要識睇，公關若與CEO唔夾，一定冇運行，搞唔掂「內部公關」嘅話，外交公關基本上唔使做，即如美國總統選舉，講到尾都係內政行先，外交有特殊天才嘅總統候選人，若然不熟內政，幾難贏到選票入主白宮。
香港公關呢行，係女士天下，至於為何，有待中文大學傳訊碩士班教授去研究。以左丁山所見，香港女士做公關，內外都咁出色，男士就勢力薄弱好多。隨手舉吓例子，大企業、大機構嘅傳訊部總監／主管，女性佔大多數，如和黃Laura、中電Quince、港燈Mimi、馬會Scarlett（兼會員事務執行總監）、長實Wendy、港大Katherine、中大Amy、科大Daisy、太古集團Cindy、旅遊發展局Cynthia、恒地Bonnie、西九文化局黃秀英等等等，都係知名公關大員。靚女公關A及B只要努力學習，向上述各位阿姐偷師，假以時日，爬上上述職位，大有可能。
公關B話：「左先生又唔好唔提男士噃。」哈，佢都幾識得講說話，一啲男士做傳訊總監直情係本港公關界殿堂級人物，薑愈老愈辣，譬如領展盧炳松、恒生張樹槐、機管局張永翔、新地廖國偉、交易所羅文慧、恒隆關則輝等幾位老友記，至於到佢地退休後，有無男士可以頂上，則左丁山孤陋寡聞，識得人少，唔敢講，由女士接替嘅機會不能抹煞。
一間大集團嘅傳訊部，如果係全女班，所請嘅公關顧問公司，又係全女班嘅話，着數還是蝕底？真係好難講，不過左丁山有一次（幾年前咯）同一位女強人食飯，佢就感嘆：「我地間會計師行請得太多女仔，因為大學會計系以女生佔多數，女生成績又係好啲嘅，但長此以往，應付客戶與做生意不時係需要啲從男人角度出發嘅意見，我係想盡量聘請多啲男畢業生㗎，有叻仔你就介紹吓啦。」
叻仔喎，個個都搶，人少渴市，請叻女相對容易啲。