查實選舉都係一場君子之爭，公公平平各有各做咪好囉，但九東嘅民主黨胡志偉團隊，發現區內有啲非建制團隊，似乎唔多守規矩。
梁志祥稱有類似遭遇
有民主黨義工向八方報料，話噚日朝早喺秀茂坪商場嘅欄杆掛出胡志偉嘅直幡，旁邊亦有其他候選人如謝偉俊嘅直幡。點知有個着住熱血公民黃洋達團隊黃tee嘅男仔，突然行埋去捲起胡志偉嘅直幡，在場義工都呆一呆，但費事嘈就等熱狗捲完後，再去開番條直幡。
短片見到呢位熱狗任務完成後，「光明正大」望向在場嘅民主黨義工展示類近「勝利的笑容」。而呢位熱狗似乎仲未夠喉，捲完胡志偉、再去捲隔籬嘅謝偉俊直幡。
被捲埋嘅胡志偉梗係譴責呢啲行為啦，而原來新界西嘅民建聯團隊，都話有類同遭遇！民建聯梁志祥話喺元朗掛出嘅直幡，之前試過被人捲起，一直唔知乜人做，最近睇番閉路電視，先發現係熱狗所為喎！
乜捲人直幡原來係最新拉票模式？熱狗嘅行為模式，相信唔少市民都同八方一樣，一啲都唔識。
該區其他參選名單，請參閱本報立會選戰網站 http://hk.apple.nextmedia.com/legco2016/region