假如大家想喺今個月20號舉行嘅日本羽毛球公開賽，見到羽客李林再次交手嘅話，恐怕都要失望喇。因為雖然馬來西亞一哥李宗偉將會以頭號種籽身份出戰，不過佢嘅宿敵兼老友、中國球手林丹就決定退賽，休息一吓。
中國羽毛球好手林丹同諶龍自里奧之後，就一直忙住出席港澳兩地嘅宣傳活動，真係忙到幾乎連休息時間都冇。或者佢哋為咗爭取機會唞唞，就決定齊齊退出今個月舉行嘅日本羽毛球公開賽。假如咁多位球迷想睇林丹同李宗偉呢對宿敵再次交手嘅話，就要再等等喇。
33歲嘅李宗偉被列為呢項賽事嘅頭號種籽，喺男單首圈嘅對手，就係泰國嘅邦沙拿。至於香港亦都有四位球手會出戰男單賽事㗎，其中「林丹殺手」伍家朗會喺首圈對印度嘅柏尼夫，胡贇就會遇上喺外圍賽晉級嘅球手，而魏楠會同五號種籽、中華台北嘅周天成交手，至於黃永棋更加會硬撼二號種籽、喺里奧贏得季軍嘅丹麥球手艾素臣㖭。
拿督國慶巡遊萬人空巷
另外，周三係馬來西亞嘅國慶日，喺里奧拎到好成績嘅羽毛球隊都有坐住開蓬巴士參加巡遊。拿督李宗偉同埋班隊友，加埋跳水女將潘德莉拉、張俊虹，以及單車選手阿旺，就齊齊帶埋獎牌同市民見面，好多市民都特登去歡迎呢班英雄㗎。大馬政府更加將呢班奧運英雄嘅相印上巴士車身，等所有市民都可以睇到啲得獎運動員嘅英姿。