投資銀行想研究報告多人睇，各出奇謀。瑞銀就搵咗心理學家、數據科學家、運輸專家同格價專員等，幫分析員全方位思考寫好份報告，過去兩年睇研究報告嘅客仔真係多一倍。
家陣投行生意難撈，研究部等後勤好易俾人「開刀」cut budget。瑞銀駐倫敦全球研究主管Juan-Luis Perez就諗到呢條好橋，去提升報告質素。
《金融時報》話，投行搵專家齊齊寫報告，係配合2018年歐盟實施新規例，研究成本同交易費「分家」。聽講新例不受脫歐公投影響，所有英國銀行都要遵守。
Perez認為，搵心理學家幫手寫研究報告，刺激分析員深入思考，更精準掌握研究問題外，用字都可以靈活啲，份報告就更有睇頭喇。Perez仲話，搵埋各路專家組成專家小組，報告唔再局限投資買乜沽乜，各行各業都可以深入探討。