英國跳水獎牌希望戴利（圖）自從出櫃之後，人氣有增無減。今次係佢第三次出戰奧運，之前喺京奧同倫奧，加埋都只係拎得一面銅牌，戴利話其中一個原因係嗰陣條泳褲有問題，細得滯勒住晒，想轉個靚啲嘅翻騰都有阻礙，但今次就唔同，條褲fit晒，信心都返晒嚟，仲有信心挑戰中國「夢之隊」，爭下金牌喎。
22歲嘅戴利將會出戰男子單人同雙人10米台，佢話今次準備十足，包括終於着到條啱心水嘅泳褲。英國隊服係由名設計師Stella McCartney負責，戴利話：「喺2008同12年，條泳褲嘅剪裁硬係唔多啱身，但今屆設計師終於可以配合番泳手嘅需要。着住條太細嘅泳褲始終周身唔聚財，喺比賽嗰陣都要小心翼翼，嗰度四方八面都有攝影機影住你，𠵱家就安心晒。」
承認咗自己係同性戀傾向嘅戴利，被問到今屆奧運放咗成45萬個避孕套喺奧運村，佢回應話：「成千上萬位運動員，個個都咁精壯，仲要閉關訓練咗咁耐，都好需要釋放下。」
另外，美國女籃成員、上屆WNBA最有價值球員達莉當妮（Elena Delle Donne），喺里約接受訪問嗰陣亦承認係同性戀，仲同一齊咗好耐嘅女伴訂埋婚。